«Beynəlxalq təşkilatlar, o cümlədən ATƏT-in Minsk qrupu vaxtında obyektiv mövqe nümayiş etdirsəydi, Ermənistan-Azərbaycan, Dağlıq Qarabağ münaqişəsi bu gün həllini tapardı». Prezident Admnistrasiyasının xarici əlaqələr şöbəsinin müdiri Novruz Məmmədov «Lider» televiziyasına müsahibəsində belə deyib. Bildirib ki, beynəlxalq aləmin mövqeyi göstərir ki, münaqişənin həlli ilə bağlı diplomatik resurslar tükənib. ATƏT-in Minsk qrupunun fəaliyyətinin nəticəsiz qalması və BMT-nin Dağlıq Qarabağ münaqişəsinə dair qəbul etdiyi qətnamələrin yerinə yetirilməməsi göstərir ki, münaqişənin həlli ilə bağlı diplomatik imkanlar tükənib. Bu fakt rəsmi bakını digər variantalara, daha dəqiqi – müharibə variantına əl atmağa vadar edir. Qərbin və beynəlxalq qurumların məsələyə laqeyd yanaşması işğalçı Ermənistana münaqişənin həllində vaxt qazanmaq üçün imkan yaradır. İrəvanın yenilənmiş «Madrid prinsipləri» ilə bağlı konkret mövqe nümayiş etdirməməsinin məsuliyyəti də Minsk qrupu ölkələrinin üzərinə düşür. Cənubi Qafqazda sülh və sabitliyin başlıca şərti Dağlıq Qarabağ münaqişəsinin həllindən asılıdır. Beynəlxalq qurumların mövqeyindən asılı olmayaraq münaqişənin Azərbaycanın ərazi bütövlüyü çərçivəsində həlli qaçılmazdır. Rəsmi Bakı bu mövqeyində israrlıdır.