Ermənistan Qazaxıstanın ATƏT-ə sədrliyindən sui - istiafdə etməyə çalışır. Dağlıq Qarabağ separatçılarını danışıqlar prosesinə cəlb etməyə can atan işğalçı ölkə, keçmiş MDB dövləti tərəfindən dəstəklənəcəyinə ümid edir. Amma ekspertlər Ermənistanın istəklərinin boşa çıxacağına əmindir. Ermənistanın xarici işlər naziri Edvard Nalbandyan Dağlıq Qarabağ speparatçılarının danışıqlar prosesinə cəlb edilməsinə dair növbəti dəfə sərsəm bəyanat səsləndirib. Erməni nazir bildirib ki, münaqişəni Dağlıq Qarabağ xalqı həll etməlidir. «Bu məsələ ötən ilin iyulunda İtaliyanın Akila şəhərində «G8» ölkələrinin sammitində Rusiya, ABŞ və Fransa prezidentlənin birgə bəyanatında da öz əksini tapıb. Azərbaycansa bu yanaşmaya qarşı çıxır»-deyən Nalbandyan iddia edir ki, rəsmi Bakı bununla nizamlama posesinə mane olur. Ekspertlər İrəvanın bu bəyanatını növbəti spekulyasiya kimi dəyərləndirirlər. Nalbandyanın bu fikri məhz ATƏT-in indiki sədri, Qazaxıstanın xarici işlər naziri Kanat Saudabayevlə görüşdən sonra səsləndirməsi də təsadüfi deyil. Ermənistanı cəsarətləndirən digər səbəb isə sırf Qazaxıstan amili ilə bağlıdır. İşğalçı ölkənin Rusiya ilə yaxınlığı ilə seçilən rəsmi Astanadan gözləntiləri var. Bu baxımdan Ermənistanın destruktiv bəyanatlarının Qazaxıstanın ATƏT-ə sədrliyi dövründə özünü doğruldacağı inandırıcı görünmür. Nizamlama prosesində ciddi irəliləyiş gözlənilməsə də, rəsmi Astana ən azı mövcud pozitiv dinamikanı qoruyub saxlamağa çalışacaq.