Yaxın illərdə ən ucqar dağ kəndlərinin əksəriyyətində mavi qazdan istifadə ediləcək. Nəzərdə tutulub ki, ən azı 3 il müddətinə ölkənin 95 faiz yaşayış məntəqəsi tam qazlaşdırılsın. Bu barədə Dövlət Neft Şirkətinin prezidenti Rövnəq Abdullayev Hacıqabulda keçirdiyi müşavirədə məlumat verib. İyul ayında Hacıqabul rayonunda müasir tələblərə cavab verən qaz təsərrüfatı istifadəyə veriləcək. Bununla da rayon mərkəzində qaz sarıdan yaşanan çətinliyə birdəfəlik son qoyulacaq. Eyni zamanda 12 kənd də tam qazlaşdırılacaq. Dövlət Neft Şirkəti qazlaşdırılan ərazilərin genişləndirilməsinə nail olmaq üçün şəhərdaxili qaz kəmərlərinin çəkilməsi ilə bərabər, digər iri layihələrin icrasını da həyata keçirir. Qazın paylanılmasnda önəmli əhəmiyyət daşıyan Hacıqabul kompressor stansiyası hazırda yeniləşdirilir. Stansiyaya baxış keçirən Rövnəq Abdullayev bildirdi ki, qazın istehsalını artırmaq və etibarlı saxlanılmasını təşkil etmək istqamətində də işlər görülür. Qış aylarında çətinlik yaranmasın deyə artıq anbarlara qazın vurulmasına da başlanılıb. Planlaşdırılıb ki, ehtiyyat olaraq anbarlara 3 milyard kubmetr qaz doldurulsun.