2004-2008-ci illəri əhatə edən «Regionların sosial - iqtisadi inkişafı dövlət proqramı»-nın qəbulundan 6 il ötür. Bu proqram ölkəyə çox şey verdi. İlk növbədə isə analoqu olmayan iqtisadi inkişaf, yeni-yeni iş yerləri. Hazırda icrası yekunlaşan proqramın davamı orlaraq, daha təkmili hazırlanıb. «Proqramın icrasının təmin edilməsi məqsədilə prezident İlham Əliyev bir sıra fərman, sərəncam və tədbirlər planı imzalayıb. Bunun nəticəsidir ki, az müddətdə regionların tarazlı və davamlı inkişafı, sosial infrastrukturun yenidən qurulması, bölgələrdə sahibkarlığın, özəl sektorun yüksələn xətt üzrə inkişafı təmin edilib. Ən əsası isə odur ki, ölkə iqtisadiyyatının neft amilindən asıllığı aradan qaldırılaraq, qeyri-neft sektoru daha sürətlə inkişaf etməyə başladı. Rəqəmlərə müraciət etsək, görərik ki, proqrama əsasən, 6 min 194 sahibkara, 236 milyon manat kredit verilib. Proqramın icrası müddətində iqtisadiyyat 96 faiz artıb. Burada büdcə daxilolmalarının 50 faizi regionların payına düşür. 75 min hüquqi, 340 min sahibkarlıq fəaliyyətilə məşğul olan fiziki şəxs yaradılıb. Naxçıvan Muxtar Respublikasında qaz kəməri, diaqnostika mərkəzi, modul elektrik stansiyası və mehmanxana, Gəncədə beynəlxalq hava limanı, İmişlidə şəkər zavodu və olimpiya idman kompleksi, Şəkidə modul elektrik stansiyası, meyvə şirəsi zavodu, Astara və Xaçmazda modul elektrik stansiyası, Lənkəranda stadion, Mingəçevirdə kompüter istehsalı müəssisəsi, Şamaxıda avtombil zavodu bu proqram çərçivəsində inşa edilən ən iri müəssisələrdəndir. Proqramın icrası dövlət xəzinəsinin gəlirlərinə də təsirini göstərdi. 2004-cü ildə 1,5 milyrad manat olan büdcə gəlirləri 2008-ci ildə 10 milyard manata kimi yüksəldi. Azərbaycan iqtisadiyyatı dünyada analoqu olmayan templə inkişaf etdi. Ölkədə yoxsulluq həddi aşağı düşdü. Bu isə proqram çərçivəsində 650 minə yaxın yeni iş yerinin yaradılması ilə mümkün olub. Proqram 2008-ci ildə icra müddətini uğurla başa vurdu. Prezident İlham Əliyev sənədin davamı olaraq, 2009-cu ilin aprel ayında regionların 2009-2013-cü illər üzrə sosial-iqtisadi inkişafı dövlət proqramını təsdiqlədi. Proqram rayon, kənd əhalisinin yeni iş yerlərilə təminini nəzərdə tutur. Yeni dövlət proqramında elm, təhsil, səhiyyə və digər sosial sahələrə də diqqət yönəldilib.