Azərbaycan və Suriya təbii qazın alqı-satqısına dair memorandumun imzalanması ilə bağlı razılaşma əldə edib. «Suria-Oil» portalının məlumatına görə, sənaye və enegetika naziri Natiq Əliyevin rəhbərlik etdiyi nümayəndə heyətinin Dəməşqdə keçirdiyi görüşlər zamanı tərəflər ildə 1-1,5 milyon kubmetr təbii qazın ixracına dair razılığa gəliblər və iki ölkə arasında bununla bağlı ilkin sənəd imzalanıb. Tərəflər həmçinin birgə müəssisənin yaradılması planlarını da müzakirə ediblər. Müəssisə neft və qaz mənbələrinin araşdırılması və istehsalı sahəsində işləyəcək. Suriyanın neft və mineral ehtiyatlar naziri Sufian Əl-Allao bildirib ki, Azərbaycan qazından ilk növbədə Suriyanın tələbatı ödəniləcək. Qalan həcm isə Livan-İordaniya-Misir-Yunanıstan kəməri vasitəsi ilə İtaliyaya ixrac ediləcək.