Naxçıvan dövlət baytarlıq xidməti muxtar respublika ərazisində peyvəndləmə tədbirlərinə başlayıb. Plana əsasən bu mövsümdə aparılan proflaktik işlər mal-qara arasında yoluxucu və təhlükəli xəstəliklərin qarşısını almaq məqsədilə həyata keçirilir. Plana uyğyn olaraq , 15 gün ərzində Muxtar Respublikadakı fermer təsərrüfatlarında bəslənən iribuynuzlu və təkdırnaqlı heyvanlara vaksinlər vurulacaq. Qonşu ölkələrdə heyvanlar arasında yoluxucu xəstəliklərin yayılması ilə bağlı xəbərlər muxtar respublikanın baytarlarını bu istiqamətdə daha sayıq olmağa sövq edir. Heyvan saxlanan qışlaqlar və tövlələrdə dizinfeksiya işləri də aparılıb. Profilaktik tədbirdə sərf edilən dərman və vaksinlər pulsuz olaraq dövlət tərəfindən təmin edilir. Baytarlıq xidməti həm də Muxtar Respublikada bu sahədə peşəkar mütəxəssislərin yetişdirilməsi istiqamətində işlər görür. Naxçıvan Dövlət Universitetinin tələbələri ixtisasla bağlı dərsləri xidmətin bazasında yaradılan tədris laboratoriyalarında keçirlər. Daha təcrübəli mütəxəssislər xidmətin digər əməkdaşları üçün də müntəzəm olaraq mühazirələr oxuyur.