Əhalinin məişət şəraitini yaxşılaşdırmaq məqsədilə Ağsu rayonunun kəndlərinə qaz xətti çəkilir. İlin sonunadək rayonun daha doqquz kəndində mavi yanacaq alovlanacaq. Regionların sosial iqtisadi inkişaf proqramına uyğun olaraq Ağsu - Çiyni istiqamətində 36 kilometr uzunluğunda magistral qaz xətti çəkilir. 315 millimetrlik politilen borudan olacaq əsas kəmərin artıq 25 kilometri hazırdır. Yaşayış məntəqələrində əvvəllər mövcud olan köhnə paylayıcı xətlər də yenilənərək, mənzillərədək 160 millimetrlik polietilin borulardan olacaq. İnşaat işlərinə 30 nəfər işçi və 6 texnika cəlb olunub. Əsas və daşıyıcı qaz xətlərinin çəkilişi başa çatdıqdan sonra hər bir abunəçinin mənzilinə fərdi tənzimləyici və sayğac da quraşdırılacaq. Bütün bu işlər də dövlət vəsaiti hesabına görüləcək. Bununla da rayonda qazdan istifadə edənlərin sayı daha 1800 abunəçi artaraq 6 000 olacaq. Qazlaşdırılan kəndlərin sayı isə 9-dan 18-ə çatacaq.